1. Ang Santos nga Rosaryo?

T. Ang Santos nga Rosaryo mao ang pag-ampo nga gihatag ngadto sa simbahan pinaagi kang Birheng Maria aron mahiusa ang tanang mga Katoliko ngadto sa mga Misteryo sa kinabuhi sa atong Ginoong Hesukristo sa panaghiusa sa Putling Kasingkasing ni Maria.

2. Unsa ang 15 ka Misteryo sa Santos nga Rosaryo?

Mga Misteryo sa Kalipay

1. Ang Pagpahibalo ni Arkanghel Gabriel Kang Maria nga Siya mahimong Inahan sa Dios

2. Ang Pagduaw ni Santa Maria kang Santa Isabel

3. Ang Pagkatawo sa Anak sa Diyos

4. Ang Paghalad sa Batang Hesus sa Templo

5. Ang Pagkakaplag sa Batang Hesus sa Templo

Mga Misteryo sa Kasakit

1. Ang Pag-ampo ni Hesus sa tanaman sa Hetsemani

2. Ang Paglatus Kang Hesus sa haliging bato

3. Ang Pagpurongpurong Kang Hesus sa korona nga tunokon

4. Ang Pagpas-an ni Hesus sa Krus

5. Ang Paglansang ug pagkamatay ni Hesus sa krus

Mga Misteryo sa Himaya

1. Ang pagkabanhaw ni Hesus

2. Ang Pagakayab sa Langit sa Anak sa Diyos

3. Ang Pagkunsad sa Espiritu Santo sa mga Apostoles

4. Ang Pagsaka sa Langit sa Mahal nga Birheng Maria

5. Ang Pagkorona sa Mahal nga Birhen nga Rayna sa Langit ug sa yuta

3. Unsa ang Kredo sa Mga Apostoles ?

T. Ang Kredo sa mga Apostoles mao ang unang pag-ampo sa Santos nga rosaryo. Gikan kini sa mga Apostoles nga nagtudlo sa unang pagtulon-an sa Katolikong Pagtoo ngadto sa mga unang Kristiyanos. Naglangkob kini sa unang mga tudlo sa Katolikong Pagtoo nga nadawat gikan Kang Kristo ug sa mga Apostoles.

’’Mitoo ako sa Diyos Amahan, makagagahum sa tanan, Magbubuhat sa Langit ug sa yuta, ug Kang Hesukristo , Iyang Bugtong Anak Atong Ginoo, gipanamkon sa lalang sa Espiritu Santo , natawo gikan ni Maria nga Birhen, nag-antus sa sugo ni Pontio Pilato , gilansang sa Krus, namatay ug gilubong. Miadto siya sa mga nangamatay, ikatulo ka adlaw nabanhaw Siya.Misaka sa langit ug nagalingkod sa too sa Diyos Amahan, Makagagahum sa tanan, mubalik siya aron sa paghukom sa mga buhi ug sa mga minatay.

Mitoo ako sa Espiritu Santo, sa Santo ug Katoliko nga Simbahan, sa panag-ambit sa mga Santos, sa kapasayloan sa mga sala, sa pagkabanhaw sa lawas, ug sa kinabuhing walay katapusan. Amen.’’

4. Unsa ang Amahan Namo ?

T. Ang Amahan Namo mao ang pag-ampo nga gitudlo sa Atong Ginoong Hesukristo sa mga Apostoles sa mga panahon nga nagpatudlo sila ug pag-ampo. Kini i-ampo sa sinugdanan sa matag Misteryo sa Santos nga Rosaryo.

“Amahan Namo nga anaa sa mga langit, pagdaygon ang Imong ngalan, umabot kanamo ang Imong gingharian, matuman ang Imong pagbuot, dinhi sa yuta maingon sa langit.

Ang kalan-on namo sa matag-adlaw, ihatag kanamo karong adlawa; ug pasayloa kami sa among mga sala, ingon nga nagapasaylo kami sa mga nakasala kanamo; ug dili Mo kami itugyan sa panulay, hinonoa luwasa kami sa kadautan. Amen.’’

5. Unsa ang Maghimaya ka Maria?

T. Ang Maghimaya Ka Maria maoy nailhang usa ka maanghelon nga pagyukbo tungod kay nagsugod kini sa mga pulong sa anghel nga si Gabriel ngadto kang Birheng Maria sa panahon sa pagpahibalo Kaniya sa plano sa Ginoo alang sa pagkatawo sa Iyang Bugtong Anak pinaagi sa Iyang balaang pagkainahan. Ang Maghimaya Ka Maria paga-ampoon 153 ka higayon sa 15 ka Misteryo sa Santos nga Rosaryo aron sa paghinumdom sa Milagro sa pagpanikop nga gimando ni Kristo ngadto sa mga Apostoles human sa Iyang Pagkabanhaw. Paga-ampoon ang Maghimaya Ka Maria napulo ka higayon sa matag usa sa mga 15 ka misteryo ug maoy timaan usab sa sagradong basahon-pangadyeanan sa 150 ka mga salmo.

’’Maghimaya Ka Maria, napuno Ka sa grasya, ang Ginoong Diyos maanaa Kanimo, bulahan Ka sa babaeng tanan ug bulahan man usab ang bunga sa tiyan Mo nga si Hesus.

Santa Maria, Inahan Ka sa Diyos, ig-ampo mo kaming mga makasasala, karon ug sa oras sa among kamatayon. Amen.’’

6. Unsa ang Himaya sa Amahan ?

T. Ang Himaya sa Amahan maoy pag-ampo sa katapusan sa matag misteryo sa Santos nga Rosaryo. Mao kini ang labing angayan tungod kay ang Himaya sa Amahan mao ang kinatibuk-an sa mga salmo ug sa tanang matuod nga pag-ampo nga mao ang pagdayeg ug paghimaya sa Santisima Trinidad.

7. Unsa ang ”O Hesus Ko” ?

T. Ang ‘’O Hesus ko’’ mao ang pag-ampo nga gihangyo sa Mahal nga Birhen sa Fatima aron idugang sa katapusan sa matag misteryo paghuman sa Himaya sa Amahan. Kining pag-ampo nagpadayag kanato sa kamahinungdanon sa pagbayad sa sala ug pag-ampo alang sa kaluwasan sa mga kalag.

8. Unsa ang Maghimaya Ka Rayna?

T. Ang Maghimaya Ka Rayna mao ang panghinapos nga pag-ampo sa mga labing mahinungdanong bahin sa Santos nga Rosaryo. Gigamit kini sa Katolikong Simbahan sa mga daghang katuigan pinaagi niini kita mangaliyupo sa talagsaong pagpanalipod ni Maria isip atong Rayna ug Inahan.

9. Gikinahanglan ba ang pagpasidungog Kang Maria alang sa atong kaluwasan ?

T. Oo, kinahanglan ang pagpasidungog Kang Maria alang sa atong kaluwasan tungod kay ang atong kaluwasan naglangkob sa pagsundog kang Hesukristo ug pagtuman sa Iyang mga sugo. Karon, si Hesus naghigugma ug mituman kang Maria, Iyang Inahan, ug isip atong Ginoo, gimandoan kita Niya sa pagtahod sa atong mga ginikanan

10. Giunsa pagpasidungog sa Santisima Trinidad si Maria ?

T. Gipasidunggan sa Santisima Trinidad si Maria sa upat ka mga mahinungdanong butang : una, sa pagmugna Kaniya nga gipanamkon nga walay sala nga panulundon pinaagi sa usa ka talagsaong katungod; ikaduha, pinaagi sa paghimo Kaniya nga takus nga Inahan sa ikaduhang persona sa Santisima Trinidad;ikatulo, pinaagi sa paghimo Kaniya nga esposa sa Espiritu Santo, mao nga siya ang Espirituhanong Inahan ug Rayna sa tanang nangaluwas. Ug ang kataposan, gipasidunggan siya sa Santisima Trinidad pinaagi sa Iyang dalayegonong pagpasaka sa langit lawas ug kalag human sa Iyang kinabuhi sa kalibutan aron gikan sa langit, aron samtang tua siya sa langit makahimo siya sa pagtabang kanato nga anaa dinhi sa yuta.

11. Giunsa nga ang bunyag makahimo kanatong anak ni Maria?

T.Ang bunyag makahimo kanatong anak ni Maria pinaagi sa paghimo kanato nga mga sakop sa Mistikong Lawas ni Kristo. Ang Bunyag nagwagtang sa atong salang panulondon ug sa tanang salang aktuwal, maghatag kanato sa grasyahanong kinabuhi nga maghiusa kanato kang HesuKristo. Kung kita usa kang Hesus, kita mamahimo dayong mga susamang manononod ni Hesus ug busa, mamahimo usab nga susamang mga anak ni Maria.

12. Unsa ang atong mga mahinungdanong katungdanan kang Maria ingon nga atong Rayna ug Inahan?

T. Ang atong mahinungdanong katungdanan : sa ingon nga mga anak, mga alagad, ug mga sundalo. Ingon nga mga anak, kinahanglan nga ato Siyang higugmaon ingun nga atong Espirituhanung Inahan, sa susamang paghigugma ni Hesus mismo kaniya ug kung asa ang Espiritu Santo nagpuno Kaniya ug gugma alang kanato. Ingon nga mga alagad, kita kinahanglan maningkamot sa pagtuman sa unsa mang mga sugo Niya ug kini mao ang pagtuman sa sugo Ginoo ug sa Simbahan. Ingon mga sundalo kinahanglan panalipdan nato ang iyang dungog batok sa mga nagdagmal kaniya o sa mistikong lawas sa iyang anak nga mao ang simbahan.

13. Sa unsang paagi nga ang kapasayloan sa mga sala maangkon sumala sa giingon sa Kredo sa mga Apostoles ug Amahan Namo ?

T. Ang kapasayloan sa mga sala alang sa mga adunay pagtoo, maangkon pinaagi sa Sakramento sa Bunyag. Alang sa mga nabunyagan na, apan nakasala pag-usab, makaangkon pinaagi sa Sakramento sa Pagkumpisal.

14. Unsa ang sala ?

T. Ang sala mao ang bisan unsang katuyuan sa hunahuna,sa pulong, o buhat o kasaypanan sukwahi sa kasuguan sa Diyos. Ang salang panulongdon , mao ang sala sa atong unang mga ginikanan ug napaambit kini sa atong pagkatawo. Ang salang aktwal mao ang sala nga kita mismo ang nagbuhat. Adunay duha ka matang sa sala, Mortal o grabi nga sala, ug binyal o diyutay nga sala. Ang salang mortal nagpugong kanato sa pagdawat sa Pagpangalawat, apan ang salang binyal, dili babag sa pagpangalawat.

15. Unsa ang Sakramento sa Pagkumpisal ?

T. Ang Sakramento sa Pagkumpisal, gitawag usab nga Penitensya, mao ang sakramento nga kung asa ang sala nga naangkon human sa bunyag mapasaylo pinaagi sa kapasayloan sa pari kung kita mangumpisal sa hingpit ug adunay tinuoray nga paghinulsol.

16. Sa unsang paagi madawat ang kalan-on sa matag adlaw ?

T. Madawat nato ang atong matag adlaw ug labing mahinungdanong kalan-on diha sa pagpangalawat sa Santos nga Misa. Mao kini ang Sakramento sa Lawas ug Dugo ni Hesukristo ilalom sa hulagway sa pan ug bino nga Iyang gihatag sa simbahan sa Katapusang Panihapon sa dihang Iyang gihimong mga unang Pari ug Obispo ang Iyang mga Apostoles.

17. Unsa ang 10 ka kasuguan sa Diyos ?

1. Ako lang ang Ginoo nga imong Diyos, wala nay laing diyos gawas Kanako.

2. Dili gamiton ang Ngalan sa Ginoo nga imong Diyos sa pagpasipala.

3. Hinumdumi nga pagsantuson ang adlaw sa Ginoo.

4. Tahuron ang imong Amahan ug Inahan.

5. Ayaw pagpatay.

6. Ayaw pangabit.

7. Ayaw pangawat.

8. Ayaw pagbutang butang sa imung silingan.

9. Ayaw kaibog sa asawa sa imong silingan.

10. Ayaw kaibog sa kabtangan sa imong silingan.

18. Unsa ang unom nga Sugo sa Simbahan ?

T. Ang unom nga gisugo sa Simbahan mao ang : 1) Pagtambong sa Misa matag Dominggo ug piyestang iglilihi, 2) Pagpuasa ug paglikay sa mga adlaw nga gipili, 3) Pagpangalawat sa panahon sa pagkabanhaw, 4) Pagpangumpisal makausa sa usa ka tuig, 5) Pagtuman sa balaod sa simbahan mahitungod sa pagpakasal, 6) Pagtabang sa mga kinahanglanon sa Simbahan.

19. Unsa ang kinamaayohan ug labing siguradong pamaaagi sa pagtuman sa mga sugo sa Dios ?

T. Makatuman kita sa mga sugo sa Dios sa kinamaayohan ug labing siguradong pamaagi : sa pagkonsagrar sa atong kaugalingon Kang Maria pinaagi sa pagsundog sa pagkonsagrar ni Hesukristo sa Iyang kaugalingon ngadto Kaniya sa dihang nahimo Siyang Iyahang anak. Sa kining pamaagiha si Maria mamahimong matuod nga Inahan kanato, samtang kita mamahimong matuod nga mga anak Niya. Ang Iyang mga pag-ampo manalipod kanato, samtang ubos sa Iyang pagsud-ong ug Iyang panabang, dili kita magduha-duha sa dalan sa kaluwasan.

20. Unsa ang Militia Immaculata ?

T. Ang Militia Immaculatae, nga gitawag M.I., mao ang usa ka talagsaong sundalo ni Maria Imakulada nga maoy magkabig sa tanang tawo paingon sa Ginoo bisan pa sila mga Protestante o Hudiyo o Muslim ug labi na gayud mga Mason ug aron nga mahimong santo ang tanan ubos sa tabang ug pagpataliwala sa Birhen Imakulada.

21. Unsa ang kabalyero sa M.I ?

T. Ang kabalyero sa M.I, mao ang usa ka tawo nga hingpit nahisakop kang Maria pinaagi sa pagkonsagrar sa iyang kaugalingon sa pag-alagad Kaniya ug katong naningkamot kutob sa iyang mahimo aron madani ang kasing-kasing sa uban ngadto Kaniya.

Busa :

1. Kinahanglan hingpit siyang makonsagrar ngadto sa Birhen Imakulada, nga magbutang sa iyang kaugalingon nga matinumanong instrumento ilalom sa Iyang mga kamot.

2. Siya kinahanglan nga magsul-ob sa Milagrosong Medalya.

Kung mahimo:

a. Gamiton ang tanang maayong pamaagi sa pagbag-o ug pagbalaan sa katawhan, sumala sa iyang oras ug abilidad, labaw sa tanan kinahanglan iyang sulayan sa pagpakatag ang Milagrosong Medalya ug pagpangalap sa uban nga mahimong miyembro sa M.I.

b. Kanunay mag-ampo : ‘’O Maria nga gipanamkon nga walay sala, ig-ampo mo kaming mga midangop Kanimo ug sa mga wala midangop Kanimo, ilabi na sa mga Mason ug sa tanang gitugyan Kanimo.

M.I. Primer Catechism - download

---